chahaton ke ḳhvab ki ta.abir thi bilkul alag
aur jiina paḌ rahi hai zindagi bilkul alag
vo alag ehsas tha jab kashtiyan maujon men thiin
lag rahi hai ab kinare se nadi bilkul alag
aur kuchh mahrumiyan bhi zindagi ke saath hain
har kami se hai magar teri kami bilkul alag
ek an-jani sada ne kya pata kya kah diya
ruuTh kar baiThi hai sab se ḳhamushi bilkul alag
lafz ki duniya alag shahr-e-ma.ani aur hai
main alag huun mujh se meri sha.eri bilkul alag
aa.ine men muskurata mera hi chehra magar
a.ine se jhankti be-chehragi bilkul alag
sochta huun rang kitne hain mire kirdar men
main kabhi apni tarah huun aur kabhi bilkul alag
sab andheron se juda dil ka andhera jis tarah
har ujale se hai ghar ki raushni bilkul alag
zindagi ki lai bikharne ka sabab shayad yahi
saaz ki dhun se hai meri naghmagi bilkul alag
mujh ko in sairabiyon ne ek sahra kar diya
aaj bhi lekin hai meri tishnagi bilkul alag
Leave a Reply