Muztar Khairabadi
chahat ki nazar aap se Daali bhi ga.i hai
hasrat kisi ashiq ki nikali bhi ga.i hai
tum ne kisi bimar ko achchha bhi kiya hai
halat kisi bigḌe ki sambhali bhi ga.i hai
tum khel samajhte ho magar ye to batao
ah-e-dil-e-muztar kabhi ḳhali bhi ga.i hai
kya ḳhaak karun men ḳhalish ishq ka shikva
ye phans kabhi tum se nikali bhi ga.i hai
jhagḌe bhi kahin rashk-e-raqabat ke miTe hain
ulfat men kabhi ḳham-ḳhayali bhi ga.i hai
‘muztar’ ko kabhi husn ka sadqa bhi diya hai
ye bhiik kabhi aap se Daali bhi ga.i hai
Leave a Reply