Bhigti Aaankhon Ke Manzar Nahin Dekhe Jate

bhīgtī ā.ankhoñ ke manzar nahīñ dekhe jaate

ham se ab itne samundar nahīñ dekhe jaate

us se milnā hai to phir sāda-mizājī se milo

ā.īne bhes badal kar nahīñ dekhe jaate

vaz.a-dārī to buzurgoñ kī amānat hai magar

ab ye bikte hue zevar nahīñ dekhe jaate

zinda rahnā hai to hālāt se Darnā kaisā

jañg lāzim ho to lashkar nahīñ dekhe jaate

Leave a Comment