bhaTak rahi hai ruuh ke andar lazzat sukhi giili si
jaise rasta bhuul ga.i ho ek nadi pathrili si
mere us ke biich ka rishta ik majbur zarurat hai
main sukhe jazbon ka indhan vo machis ki tiili si
dekhun kaisi fasl ugata hai mausam tanha.i ka
dard ke biij ki nasl hai unchi dil ki miTTi giili si
darvaze par munh laTka.e qillat rang-o-roghan ki
angan angan jashn mana.e ḳhvahish niili piili si
mujh ko baanT ke rakh deti hai dhuup chhanv ke ḳhemon men
kuchh be-ghairat si masrufi kuchh fursat sharmili si
din bhar ki jan-soz thakan ka ajr chukane ko ‘ḳhurshid’
shaam ke parbat par baiThi hai ik saa.at nokili si
Leave a Reply