Khalid Ahmad
bevafa huun na vafadar huun main
sach to ye hai ki adakar huun main
si diye us ne mire honT to kya
ab mujassam lab-e-iz.har huun main
mere hathon men gaḌe hain kanTe
phuul huun aur sar-e-dar huun main
har kiran Duub chali surat-e-nabz
kin andheron men ziya-bar huun main
zehn hai sar pe laTakti talvar
kin aqa.ed men giraftar huun main
is liye mujh se ḳhafa hai koi
us ka hote hue ḳhuddar huun main
Leave a Reply