Arsh Malsiyani
bayan hon bhi to hon aḳhir kahan jo dil ki baten hain
na tanha.i ki baten hain na ye mahfil ki baten hain
murattab kar liya yuun ham ne afsana mohabbat ka
kuchh un ke dil ki baten hain kuchh apne dil ki baten hain
jo un men phans gaya phir raah par vo aa nahin sakta
baḌe chakkar ki baten rahbar-e-manzil ki baten hain
tumhara va.az raz-e-ishq kya kholega ai vaa.iz
zaban ki ye nahin hazrat ye chashm-o-dil ki baten hain
vo mahfil se juda bhi ho chuke mahfil ko garma kar
magar mahfil men ab tak garmi-e-mahfil ki baten hain
zaban se kuchh kaho sahab magar ma.alum hai ham ko
tumhare dil ki sab baten hamare dil ki baten hain
mujhe dars-e-sukun dete hain vo josh-e-tamanna men
udhar tufan ki ḳhvahish hai idhar sahil ki baten hain
main apne hal-o-mazi par bhi kuchh ai ‘arsh’ ro leta
magar pesh-e-nazar is vaqt mustaqbil ki baten hain
Leave a Reply