Bayan Hon Bhi to Hon aaKHir Kahan Jo Dil Ki Baaten Hain

bayāñ hoñ bhī to hoñ āḳhir kahāñ jo dil kī bāteñ haiñ

na tanhā.ī kī bāteñ haiñ na ye mahfil kī bāteñ haiñ

murattab kar liyā yuuñ ham ne afsāna mohabbat kā

kuchh un ke dil kī bāteñ haiñ kuchh apne dil kī bāteñ haiñ

jo un meñ phañs gayā phir raah par vo aa nahīñ saktā

baḌe chakkar kī bāteñ rahbar-e-manzil kī bāteñ haiñ

tumhārā va.az rāz-e-ishq kyā kholegā ai vaa.iz

zabāñ kī ye nahīñ hazrat ye chashm-o-dil kī bāteñ haiñ

vo mahfil se judā bhī ho chuke mahfil ko garmā kar

magar mahfil meñ ab tak garmī-e-mahfil kī bāteñ haiñ

zabāñ se kuchh kaho sāhab magar ma.alūm hai ham ko

tumhāre dil kī sab bāteñ hamāre dil kī bāteñ haiñ

mujhe dars-e-sukūñ dete haiñ vo josh-e-tamannā meñ

udhar tūfāñ kī ḳhvāhish hai idhar sāhil kī bāteñ haiñ

maiñ apne hāl-o-māzī par bhī kuchh ai ‘arsh’ ro letā

magar pesh-e-nazar is vaqt mustaqbil kī bāteñ haiñ

Leave a Comment