ban-sanvar kar ho jo vo jalva-numa koThe par
charḳh-e-charum ka nazar aa.e sama koThe par
tasht-az-bam na karna kahin raz-e-ulfat
na ishare karo ai shoḳh-ada koThe par
Dore Dalen na kahin yaar uḌane vaale
be-takalluf na yuun kankavve uḌa koThe par
sab ko mahtab ka dhoka hua mahtabi par
kal sar-e-sham vo mah-ru jo chaḌha koThe par
vo kaha karte hain koThon chaḌhi honTon nikli
dil men hi rakhna jo kal raat hua koThe par
chandni ho bichhi aur chand ne ho khet kiya
aur pahlu men ho vo mah-laqa koThe par
aftab-e-lab-e-bam ab to hue hain ‘kaifi’
ankhen phir us se laḌa.en bhala kya koThe par
Leave a Reply