baḌha ye shak ki ghairon ki tan men aag lagi
ham aa.e kya ki tiri anjuman men aag lagi
zara jo us ne haTa.i naqab chehre se
giri vo barq ki sab anjuman men aag lagi
barabar aaj ḳhabar ashk-e-garm laate hain
ghazab ki qasr-e-dil-e-pur-mehan men aag lagi
ye tera vahshi-e-atish-nafas jahan pahuncha
pahaḌ jal ke hue ḳhaak ban men aag lagi
jala raha hai ye kah kah ke dam-ba-dam sayyad
tujhe ḳhabar bhi hai bulbul chaman men aag lagi
kamal-e-husn ki garmi se mujh ko hairat hai
ki aaj tak na mire pairahan men aag lagi
jab ah-e-garm chali dil se saath dauḌe ashk
hua yaqin ki kam-o-dahan men aag lagi
chahar samt se le le ke paani abr aaya
khile jo phuul to jaana chaman men aag lagi
jahan paḌhe ga.e ash.ar tere garma-garm
‘rashid’ mahfil-e-ahl-e-suḳhan men aag lagi
Leave a Reply