ahmad-rizwan

Baat Karne Ka Nahin Samne Aane Ka Nahin

baat karne ka nahin samne aane ka nahin

vo mujhe meri aziyyat se bachane ka nahin

duur ik shahr hai jo paas bulata hai mujhe

varna ye shahr kahin chhod ke jaane ka nahin

kya yunhi raat ke pahlu men kategi ye hayat

kya koi shahr ke logon ko jagane ka nahin

ajnabi log hain main jin men ghira rahta huun

ashna koi yahan mere fasane ka nahin

ye jo ik shahr hai ye jis pe tasarruf hai mira

main yahan koi bhi divar banane ka nahin

baad muddat ke jo aaya tha vahi laut gaya

ab yahan koi charaghon ko jalane ka nahin

aane vaali hai nai sub.h zara der ke baad

kya koi rah-e-tamanna ko sajane ka nahin

More Poems

Leave a Comment