Azal Se Justuju Ki Sargirani Le Ke Aaya Hun

Sirajuddin Zafar

azal se justuju ki sargirani le ke aaya huun

talash-e-husn hai sham.a-e-javani le ke aaya huun

tiri mahfil se hasrat ki nishani le ke aaya huun

vafa ki aarzu thi sargirani le ke aaya huun

jahan main zauq-e-husn-e-javedani le ke aaya huun

kahan ki kis ḳharabe men kahani le ke aaya huun

miri hasti zamane ke miTa.e se nahin miTti

azal se main nishan-e-be-nishani le ke aaya huun

miri ḳhamosh surat a.ina-dar-e-mohabbat hai

main a.ine se husn-e-be-zabani le ke aaya huun

bhaḌak uTThun na ḳhud apni nava-e-sho.ala-saman se

ḳhas-o-ḳhashak men shola-bayani le ke aaya huun

mohabbat ko to umr-e-javedan bhi muḳhtasar hogi

ilahi kya karun main umr-e-fani le ke aaya huun

‘zafar’ kya taab laa.e koi tufan-e-mohabbat ki

hava ke samne sham.a-e-e-javani le ke aaya huun