apne aaba se bahut duur hua jaata hai
aadmi ishq men majbur hua jaata hai
is men kya chand sitaron ko qabahat hogi
zarra-e-ḳhak agar nuur hua jaata hai
dekhna yaar vahi hoga vahi hona hai jo
mere allah ko manzur hua jaata hai
dard aisa ki baḌhta hai mire siine men
zaḳhm aisa ki nasur hua jaata hai
naqsh ban kar yahi ubhrega sar-e-sehn-e-jahan
aks manzar men jo mastur hua jaata hai
us ke ruḳhsar se hota hua lab tak pahuncha
ashk to mashrab-e-angur hua jaata hai
main use chahte rahne men huun masruf ‘fida’
ye gunah mujh se ba-dastur hua jaata hai
Leave a Reply