andhere duur kare nuur se ujale mujhe
koi to ho jo tire ba.ad bhi sambhale mujhe
main mar raha huun magar saans de rahe hain baham
tumhari zaat se mansub kuchh havale mujhe
ye rud-e-ḳhvab nahin maḳhmase ka dariya hai
Dubo.e ishq kabhi josh men uchhale mujhe
abhi main rail ki paTri se duur baiTha huun
abhi hai vaqt agar ho sake mana le mujhe
nahin hai yaad mujhe naam haan magar ankhen
sharab bhuul chuka yaad hain pyale mujhe
main saunp duun use in.aam men bachi sansen
mire vajud ke malbe se jo nikale mujhe
nishan mel ki ranginiyon ke sadqe hue
bahut aziiz hain paanv ke saare chhale mujhe
Leave a Reply