asman ka sard sannaTa pighalta ja.ega
aankh khulti ja.egi manzar badalta ja.ega
phailti ja.egi charon samt ik ḳhush-raunaqi
ek mausam mere andar se nikalta ja.ega
meri rahon men hasin kirnen bikharti ja.engi
aḳhiri taara pas-e-kohsar Dhalta ja.ega
bhulta ja.unga guzri sa.aton ke hadse
qahr-e-a.inda bhi mere sar se Talta ja.ega
raah ab koi ho manzil ki taraf le ja.egi
paanv ab kaisa paḌe ḳhud hi sambhalta ja.ega
ik saman khulta hua sa ik faza be-dagh si
ab yahi manzar mire ham-rah chalta ja.ega
chhu sakegi ab na mere haath tufani hava
jis diye ko ab jala dunga vo jalta ja.ega
Leave a Reply