suraj se saae ki tavaqqoa badal se sunahri dhuup ki
kanton se mahakte phuul ki khushbu sahra se hariyali ki
kaise bhule aap hain sahab kaisi tavaqqoa rakhte hain
kichad men jab aap chalenge paanv to gande honge hi
jhuton ki sohbat men rah kar sach kaise kah paenge
mare hue insan ke lahm se kyuun raghbat rakhte hain aap
ab bhi thoda vaqt bahut hai qalb-e-mahiyat kar len
ahl-e-havas ke samne jhuk ke
baunon ki sana men be-khud hain
apne ji ka sauda kar ke logon ki malamat sahte hain
bahut hua bas band karen ab apni zamir-faroshi ko
duniya vaale sochte honge aalam kyuun aise hain ab
lekin un ko kaun batae
aap ne zar aur jism ki khatir
jahil ko tauqir hai bakhshi aalim ko ban-bas diya hai
aur aalim tujh kizb-e-sifat ko mahv-e-hairat taak raha hai
ilm jo shahr-e-ilm ke bahar ab bhi girya karta hai
apni aur teri halat par gham ke aansu rota hai
kaash ki ho taufiq zara si
thoda pasheman ho len aap
tauba ki manzil se pahle
apni surat dekhen aap
Leave a Reply