aaj ke din ko yuun bhar ja.unga
ban ke ik umr guzar ja.unga
sub.h men paida hua tha phir se
aur phir raat ko mar ja.unga
main ta.aqub men huun apne dil ke
ye jidhar jaa.e udhar ja.unga
ye salib aur ye kilen mujh se
jo nikaloge bikhar ja.unga
is laḌa.i men mire Dar se miri
chhoḌ kar apni sipar ja.unga
haar ke bhi mujhe jaana jo paḌe
main jhuka ke nahin sar ja.unga
manzilen naam tumhare kar ke
saath men le ke Dagar ja.unga
ḳhatm mera ye safar hoga nahin
raste men ho to ghar ja.unga
baad mere na bhari ja.egi
vo jagah dil men main kar ja.unga
mustahiq aankh milegi jo kahin
de ke us ko main nazar ja.unga
kuchh ghaḌi saath nibha bhi duun to kya
aḳhirash to main magar ja.unga
pyaas ko rakh ke kinare us ke
ye jo sahra hai main tar ja.unga
Leave a Reply