aag lag ja.egi ik din miri sarshari ko
main jo deta huun hava ruuh ki chingari ko
varna ye log kahan apni hadon men rahte
main ne ma.aqul kiya hashiya-bardari ko
ye parinde hain ki darvesh hain zindanon ke
kuchh samajhte hi nahin amr-e-giraftari ko
ab hamen zindagi karne men suhulat di jaa.e
khinch laa.e hain yahan tak to giran-bari ko
ek tufan-e-bala-ḳhez ne manzar badla
peḌ tayyar hue rasm-e-nigun-sari ko
us ne vo zahr havaon men milaya hai ki ab
konplen sar na uTha.engi numudari ko
kaun khinga mire jism ki zanjir ‘azar’
kaun asan karega miri dushvari ko
Leave a Reply