rang-dar-rang hijabat uThane honge
be-mahaba hamen sab jalve dikhane honge
jin ko tariḳh ki nazren bhi kabhi chhu na saken
batn-e-giti men ka.i aise zamane honge
aaj tak shahon ki tahvil men jo aa na sake
saikḌon aise pur-asrar ḳhazane honge
pusht-ha-pusht se jo dast-nigar rahte hain
an-ginat aise bhi mazlum gharane honge
jin men ghurbat ke asiron ko jagah mil na saki
vo falak-bos mahallat girane honge
jin men dahqanon ki hasrat ka jhalakta hai lahu
ham ko vo gulshan-e-shadab jalane honge
na.e andaz se chheḌi hai ghazal ‘farigh’ ne
ab har ik lab pe baghavat ke tarane honge
Leave a Reply