Farhan Salim
udaas shaam men pazhmurda baad ban ke na aa
jo aa sake to ḳhud aa apni yaad ban ke na aa
kabhi sahar bhi to ban ai visal ke mausam
sada yuun hi shab-e-marg-e-murad ban ke na aa
tujhe tire mah o anjum ka vasta ai raat
mire in ujle daron par savad ban ke na aa
kitab-e-zist ḳhuda-ra koi ghazal bhi suna
shikast-e-jan ki faqat ruedad ban ke na aa
bhali lage to ise gunguna bhi ai lab-e-yar
miri ghazal pe faqat harf-e-dad ban ke na aa
utar zarur magar aah sub.h-e-azadi
kisi zamin pe vaj.h-e-fasad ban ke na aa
Leave a Reply