hansne men rone ki aadat kabhi aisi to na thi
teri shoḳhi gham-e-furqat kabhi aisi to na thi
ashk aa jaa.en to palkon pe biThaunga unhen
qatra-e-ḳhun tiri izzat kabhi aisi to na thi
kisht-e-gham aur bhi lahrane lagi hansne lagi
chashm-e-nam teri shararat kabhi aisi to na thi
kitne gham bhuul gaya shukriya tera gham-e-yar
yuun mujhe teri zarurat kabhi aisi to na thi
vo mujassam bhi jo aa jaa.e to dekhun na use
meri us but ki ibadat kabhi aisi to na thi
der tak baiThe pa kuchh tu ne na main ne hi kaha
jaisi tujh se hai rifaqat kabhi aisi to na thi
ek ik sher se Tapke hain lahu ke qatre
meri dushman ye tabi.at kabhi aisi to na thi
Leave a Reply