kabhi qatar se bahar kabhi qatar ke biich
main hijr-zad hua ḳharch intizar ke biich
bana hua hai ta.alluq sa ustuvari ka
mire tavaf se is mehvar o madar ke biich
ki aata jaata rahe aks-e-hairati is men
bichha diya gaya a.ina ar-par ke biich
hava ke khel men shirkat ke vaste mujh ko
ḳhizan ne shaḳh se phenka hai rahguzar ke biich
ye main huun tu hai hayula hai har musafir ka
jo miT raha hai thakan se udhar ghubar ke biich
koi lakir si paani ki jhilmilati hai
kabhi kabhi mire matruk abshar ke biich
main umr ko to mujhe umr khinchti hai ulaT
tazad samt ka hai asp aur savar ke biich
Leave a Reply