Dattatriya Kaifi
lutf ho hashr men kuchh baat bana.e na bane
aankh bhi shoḳh sitam-gar se chura.e na bane
mujh ko uThva to diya us ne bhari mahfil se
kaun tha ye koi puchhe to bata.e na bane
baat saari ye hai vo zid pe aḌe baiThe hain
yaad ki bhuul ho to laakh jata.e na bane
tum se ab kya kahen vo chiiz hai dagh-e-gham-e-ishq
ki chhupa.e na chhupe aur dikha.e na bane
sidhi baton pe hai matlub sanad aur subut
hain vo kaj-bahas zaban un se mila.e na bane
fat.h ka raaz hai sabit-qadmi aur himmat
kaam bhi hai koi aisa ki bana.e na bane
baat vo kah ga.e aa.e bhi to kis tarah yaqin
aur sehr is men kuchh aisa hai bhula.e na bane
be-kasi ki hai musibat men shikayat be-sud
kab paḌa vaqt ki apne bhi para.e na bane
gham jo pyare se mile kyuun na ho vo bhi pyara
bhulna bhi use chahen to bhula.e na bane
hai nazar men vo saman naqsh hai jis ka dil par
dard vo naam hai lab tak jise laa.e na bane
be-ḳhudi ka hai jahan be-asar naaz o niyaz
sarkashi bhi na chale sar bhi jhuka.e na bane
ah-e-sard aur bhi bhaḌkati hai shola dil men
ye diya vo hai jo phunkon se bujha.e na bane
sard azad hai dil rashk o numa.ish hai abas
ḳhaar khaa.e na bane gul bhi khila.e na bane
ain yak-rangi hai nairang-e-tamasha har chand
ye vo uryani ka parda hai uTha.e na bane
be-ḳhudi men bhi to ‘kaifi’ ki ye ḳhuddari hai
hal-e-dil puchh bhi len vo to suna.e na bane
Leave a Reply