dil kiye tasḳhir baḳhsha faiz-e-ruhani mujhe
hubb-e-qaumi ho gaya naqsh-e-sulaimani mujhe
manzil-e-ibrat hai duniya ahl-e-duniya shaad hain
aisi dil-jam.i se hoti hai pareshani mujhe
janchta huun vus.at-e-dil hamla-e-gham ke liye
imtihan hai ranj-o-hirman ki faravani mujhe
haq-parasti ki jo main ne but-parasti chhoḌ kar
barhaman kahne lage ilhad ka baani mujhe
kulfat-e-duniya miTe bhi to saḳhi ke faiz se
haath dhone ko mile bahta hua paani mujhe
ḳhud-parasti miT ga.i qadr-e-mohabbat baḌh ga.i
matam-e-ahbab hai talim-e-ruhani mujhe
qaum ka gham mol le kar dil ka ye aalam hua
yaad bhi aati nahin apni pareshani mujhe
zarra zarra hai mire kashmir ka mehman-navaz
raah men patthar ke TukḌon ne diya paani mujhe
lucknow men phir hui arasta bazm-e-suḳhan
baad muddat phir hua zauq-e-ghazal-ḳhvani mujhe
Leave a Reply