ye basti pyaar ki ne.amat se ḳhali hoti jaati hai
ki har hatim ki surat bhi savali hoti jaati hai
kisi se puchh lo ta.abir apne apne ḳhvabon ki
dayar-e-misr men phir ḳhushk-sali hoti jaati hai
ye kaise rang utre hain jinhen dekha nahin jaata
ye kaisi sub.h phuTi hai jo kaali hoti jaati hai
purane maqbaron men bhi daraḌen paḌti jaati hain
na.i ta.amir bhi naqsh-e-ḳhayali hoti jaati hai
bahav aa.e din umr-e-ravan ka ghaTta jaata hai
ye ThaThen marti naddi bhi naali hoti jaati hai
Leave a Reply