Farhat Ehsas
vo meri jaan ke sadaf men guhar sa rahta hai
men us ko toḌ na Dalun ye Dar sa rahta hai
vo chehra ek shifa-ḳhana hai miri ḳhatir
vo ho to jaise koi charagar sa rahta hai
main us nigah ke hamrah jab se aaya huun
mujhe na jaane kahan ka safar sa rahta hai
baḌa vasi.a hai us ke jamal ka manzar
vo a.ine men to bas muḳhtasar sa rahta hai
miri zamin ko mayassar hai asman us ka
kahin bhi ja.un mire saath ghar sa rahta hai
Leave a Reply