kahte hain sun ke tazkire mujh gham-rasida ke
afsane kaun sunta hai hal-e-shunida ke
kya apni musht-e-khak ki ham justuju karen
milte nahin nishan ghubar-e-parida ke
main khaak bhi hua na gai par kashidgi
ghusse vahi rahe mire daman-kashida ke
jo tum men baat hai vo kisi aur men kahan
jalve kuchh aur hi hain gul-e-nau-damida ke
sailab-e-chashm-e-tar se zamana kharab hai
shikve kahan kahan hain mire ab-dida ke
kuchh intiha nahin hai kahan tak sunaiye
qisse daraz hain dil-e-na-armida ke
qatre mile jo tere pasine ke gul-badan
khvahan rahe na log gulab-e-chakida ke
aahon ki dhuum hai kahin nalon ke gulgule
saman nae hain rose tire gham-kashida ke
aram-gah-e-ashk hai viran ai junun
daman hain taar taar qaba-e-darida ke
o mast-e-naz kaif ye tere sukhan men hai
dhoke kalam par hain sharab-e-chakida ke
lo ashiyan-e-tan ki taraf mel tak nahin
dekho mizaj tair-e-rang-parida ke
divan men vasf hai araq-e-jism-e-yar ka
mazmun kahan kahan hain gulab-e-chakida ke
mizhgan se bach ‘nasim’ ki abru ke paas hain
ye tir-e-be-khata hain kaman-e-kashida ke
Leave a Reply