ghar ke fard apne ghar ko bhuul ga.e
ham-safar ham-safar ko bhuul ga.e
thi na pahchan kuchh bhi jin ke baghair
log unhin bam-o-dar ko bhuul ga.e
barha ishq men fareb mila
barha dard-e-sar ko bhuul ga.e
turshiyon ko laga ke munh ham log
lutf-e-shir-o-shakar ko bhuul ga.e
ghair par munhasir hue jab ham
apne dast-e-hunar ko bhuul ga.e
pher men jab se pattharon ke paḌe
shishagar shishagar ko bhuul ga.e
nazron vaale bhi ho ga.e ru-posh
ham bhi ahl-e-nazar ko bhuul ga.e
ham se qurbat baḌha ke taa.ir bhi
masraf-e-bal-o-par ko bhuul ga.e
is qadar pech-o-ḳham mile ke ‘nihal’
ham rah-e-mo’tabar ko bhuul ga.e
Leave a Reply