Niyaz Husain Lakhwera
ik vo bhi din the tujh se mira rabta na tha
sanjidgi se tere liye sochta na tha
nafrat mili to zom-e-vafa TuuT TuuT kar
bikhra kuchh is tarah ki koi vasta na tha
kamre men phailti hi ga.i raushni ki lahr
kirnon ka jaal tha ki kahin TuTta na tha
dekha tujhe to chand bhi peḌon men chhup gaya
vaise to shahr bhar men koi chand sa na tha
vo apni zaat men hi muqayyad raha ‘niyaz’
sab dekhte the us ko koi DhunDhta na tha
Leave a Reply