Naseer Parwaz
atishin sailab men jab ruuh Daali ja.egi
tishnagi sadiyon ki ashkon se bujha li ja.egi
TuTti divar ka saaya badan ki aabru
jaane kab mere yaqin ki ḳhush-ḳhayali ja.egi
tu ne bhi jhuTla diya harf-e-tafakkur ka vajud
ab miri avaz kis jholi men Daali ja.egi
iztirab-e-jan hisar-e-sang-bari tang kar
jism ki tahzib zaḳhmon se ujali ja.egi
aftabon ki basirat sat.h par bedar hai
kis tarah ye vus.at-e-hasti khangali ja.egi
zulmat-e-shab ne jo Tapka.i hai meri ruuh par
vo amanat kaise suraj se sanbhali ja.egi
shahr men bedar kyon hain ḳhak-o-ḳhun ki andhiyan
ye agar puchhoge sachcha.i chhupa li ja.egi
DhunDne a.engi jab mujh ko miri parchha.iyan
muntashir majruh jismon se dua li ja.egi
shahr men baḌh ja.engi ‘parvaz’ jab pabandiyan
raushni ankhon ki muTThi men daba li ja.egi
Leave a Reply