Rafia Shabnam Abidi
zaat ke karb ko lafzon men dabae rakkha
mez par teri kitabon ko sajae rakkha
tu ne ik shaam jo aane ka kiya tha vaada
main ne din-rat charaghon ko jalae rakkha
kis saliqe se khayalon ko zaban de de kar
mujh ko us shakhs ne baton men lagae rakha
main vo siita ki jo lachhman ke hisaron men rahi
ham vo jogi ki alakh phir bhi jagae rakkha
shayad aa jaae kisi rose vo sajda karne
isi ummid pe anchal ko bichhae rakkha
chudiyan rakh na sakin meri namazon ka bharam
phir bhi hathon ko duaon men uthae rakkha
jaane kyuun aa gai phir yaad usi mausam ki
jis ne ‘shabnam’ ko havaon se bachae rakkha
Leave a Reply