Aleena Itrat
ye kis muhim par chale the ham jis men raste pur-khatar na aae
hamen navaza na vahshaton ne hamen junun ke hunar na aae
mujhe bahut tez dhuup darkar hai mohabbat ke is safar men
chamakte suraj ko saaya karne koi ghanera shajar na aae
andheri shab ka ye khvab-manzar mujhe ujalon se bhar raha hai
ye raat itni tavil kar de ki ta-qayamat sahar na aae
jahan huun teri hi raunaqen aur tire nazare hi charon janib
us anjuman ka pata bata de jahan se meri khabar na aae
jo laut aae koi safar se to phir musafir kahan hua vo
vahi musafir hai jo safar men hai aur kabhi laut kar na aae
vo asmanon men rahne vaala sunega ik din ‘alina’ teri
sada ko apni buland rakh tu dua men jab tak asar na aae
Leave a Reply