Yaad

Jigar Moradabadi

aai jab un ki yaad to aati chali gai

har naqsh-e-ma-siva ko mitati chali gai

har manzar-e-jamal dikhati chali gai

jaise unhin ko samne laati chali gai

har vaqia qarib-tar aata chala gaya

har shai hasin-tar nazar aati chali gai

virana-e-hayat ke ek ek goshe men

jogan koi sitar bajati chali gai

dil phunk raha tha atish-e-zabt-e-firaq se

dipak ko mai-gusar banati chali gai

be-harf o be-hikayat o be-saz o be-sada

rag rag men naghma ban ke samati chali gai

jitna hi kuchh sukun sa aata chala gaya

utna hi be-qarar banati chali gai

kaifiyyaton ko hosh sa aata chala gaya

be-kaifiyon ko niind si aati chali gai

kya kya na husn-e-yar se shikve the ishq ko

kya kya na sharmsar banati chali gai

tafriq-e-husn-o-ishq ka jhagda nahin raha

tamiz-e-qurb-o-buad mitati chali gai

main tishna-kam-e-shauq tha piita chala gaya

vo mast ankhdiyon se pilati chali gai

ik husn-e-be-jihat ki faza-e-basit men

udti gai mujhe bhi udati chali gai

phir main huun aur ishq ki betabiyan ‘jigar’

achchha hua vo niind ki maati chali gai