Aal E Ahmad Suroor
vo jien kya jinhen jiine ka hunar bhi na mila
dasht men khaak udate rahe ghar bhi na mila
khas-o-khashak se nisbat thi to hona tha yahi
dhundne nikle the shole ko sharar bhi na mila
na puranon se nibhi aur na nae saath chale
dil udhar bhi na mila aur idhar bhi na mila
dhuup si dhuup men ik umr kati hai apni
dasht aisa ki jahan koi shajar bhi na mila
koi donon men kahin rabt-e-nihan hai shayad
but-kada chhuta to allah ka ghar bhi na mila
haath utthe the qadam phir bhi badhaya na gaya
kya taajjub jo duaon men asar bhi na mila
bazm ki bazm hui raat ke jaadu ka shikar
koi dil-dada-e-afsun-e-sahar bhi na mila
Leave a Reply