Aal E Ahmad Suroor
vo ehtiyat ke mausam badal gae kaise
charagh dil ke andhere men jal gae kaise
bana diya tha zamane ne barf ke manind
ham ek shokh kiran se pighal gae kaise
umiid jin se thi vaz-e-junun nibhane ki
vo log vaqt ke sanche men dhal gae kaise
sitare jazb hue gard-e-rah men kya kya
khayal-o-khvab ke aaiin badal gae kaise
khizan se jin ko bacha laae the jatan kar ke
vo nakhl ab ke baharon men jal gae kaise
na jaane kyuun jinhen samjhe the ham farishte hain
qarib aae to chehre badal gae kaise
har ek saya-e-divar ki lapet men hai
‘surur’ aap hi bach kar nikal gae kaise
Leave a Reply