Bahadur Shah Zafar
vaan rasai nahin to phir kya hai
ye judai nahin to phir kya hai
ho mulaqat to safai se
aur safai nahin to phir kya hai
dilruba ko hai dilrubai shart
dilrubai nahin to phir kya hai
gila hota hai ashnai men
ashnai nahin to phir kya hai
allah allah re un buton ka ghurur
ye khudai nahin to phir kya hai
maut aai to tal nahin sakti
aur aai nahin to phir kya hai
magas-e-qab aghniya hona hai
be-hayai nahin to phir kya hai
bosa-e-lab dil-e-shikasta ko
momyai nahin to phir kya hai
nahin rone men gar ‘zafar’ tasir
jag-hansai nahin to phir kya hai
Leave a Reply