Asif Ud Daula
vahshat men su-e-dasht jo ye aah le gai
kya kya kunen jhukane tiri chaah le gai
aae kabhi na raah pe kya janiye hamen
kidhar ko ye tabiat gumrah le gai
kaabe men bhi gae to hamen teri yaad aah
phir su-e-dair ai but-e-dil-khvah le gai
us ne kahan bulaya tha ye is ke ghar hamen
nahaq zaban-e-khalq ki afvah le gai
jarub-kash ne us ke na rahne diya mujhe
gardan nasim shakl-e-par-e-kah le gai
juun tiir dil se aah jo nikle to kya kahun
bas jaan ko bhi apne vo hamrah le gai
‘asif’ chaman men aate hi us rashk-e-gul ki yaad
kya janiye kidhar mujhe nagah le gai
Leave a Reply