Poet
us ke chehre pe tabassum ki ziya aaegi
vo mujhe yaad karega to haya aaegi
odh kar jism pe yadon ki rida aaegi
jab bhi maazi ke jharokon se hava aaegi
kaun mazlum ki fariyad sunega na-haq
laut kar dasht men khud apni sada aaegi
kis qadar bikhra hua huun main bichhad ke tujh se
yaad ab kis ki mujhe tere siva aaegi
band kamron men kisi ko bhi ye ehsas na tha
dar khulenge to bahut tez hava aaegi
ghair-manus fazaon men to khush huun lekin
jaane kis mod pe manus faza aaegi
naam to apna gunahgaron ki fihrist men likh
tere hisse men bhi rangin qaba aaegi
zindagi sab se juda guzregi apni ‘anjum’
maut bhi aai to vo sab se juda aaegi
Leave a Reply