Qateel Shifai
raushni nahin hai duur duur tak
jaao mujh ko chhod do
khamushi hai mai-kade se tuur tak
barbaton ko tod do
ye udaas raat ki siyahiyan
niind aa ke tal gai
ye mire nasib ki siyahiyan
shama kab ki jal gai
niind hai na chand hai na jaam hai
pyaas kya bujhaoge
zindagi ki tegh be-niyam hai
aas kya bandhaoge
asman buland hai to kya karun
haae meri pastiyan
kaash main tumhen kabhi dikha sakun
kuchh ujaad bastiyan
hasraton ka baagh baagh ujad gaya
phuul ab khilenge kya
ek ek ham-safar bichhad gaya
dost ab milenge kya
mishalen nahin to ye charagh kyuun
raah bhuul jaunga
zindagi pe koi taaza daagh kyuun
chaah bhuul jaunga
raushni nahin hai duur duur tak
jaao mujh ko chhod do
khamushi hai mai-kade se tuur tak
barbaton ko tod do
Leave a Reply