Ameer Minai
tiir par tiir lagao tumhen dar kis ka hai
siina kis ka hai miri jaan jigar kis ka hai
khauf-e-mizan-e-qayamat nahin mujh ko ai dost
tu agar hai mire palle men to dar kis ka hai
koi aata hai adam se to koi jaata hai
sakht donon men khuda jaane safar kis ka hai
chhup raha hai qafas-e-tan men jo har tair-e-dil
aankh khole hue shahin-e-nazar kis ka hai
nam-e-shair na sahi sher ka mazmun ho khuub
phal se matlab hamen kya kaam shajar kis ka hai
said karne se jo hai tair-e-dil ke munkir
ai kaman-dar tire tiir men par kis ka hai
meri hairat ka shab-e-vasl ye baais hai ‘amir’
sar ba-zanu huun ki zaanu pe ye sar kis ka hai
Leave a Reply