Thakan Se Chur Hun Lekin Rawan-dawan Hun Main

Aziz Bano Darab Wafa

thakan se chuur huun lekin ravan-davan huun main

nai sahar ke charaghon ka karvan huun main

havaen mere varaq laut laut deti hain

na jaane kitne zamanon ki dastan huun main

har ek shahr-e-nigaran samajh raha hai mujhe

zara qarib se dekho dhuan dhuan huun main

kisi se bhiid men chehra badal gaya hai mira

to saare aina-khanon se bad-guman huun main

main apni guunj men khoi huun ek muddat se

mujhe khabar nahin kuchh kaun huun kahan huun main

khud apni diid se mahrum hai nazar meri

azal se surat-e-nazzara darmiyan huun main

mira vajud-o-adam raaz hai hamesha se

vahan vahan bhi nahin huun jahan jahan huun main