Rumana Rumi
tere saath chalti huun ik jahan jaata hai
gar gurez karti huun tera maan jaata hai
dard ke havale se kitna ba-khabar hai vo
mere dil ki baton ko kaise jaan jaata hai
dhuup hi to milti hai zard zard mausam men
vahshaton ke sahra men saeban jaata hai
khak-e-dil tujhe le kar ab kahan kahan jaun
gar zamin ki hoti huun asman jaata hai
hijr ke samundar se main guzar ke aai huun
tere ab na milne se mera maan jaata hai
jab ravish pe chalti huun main ada-e-vahshat ki
phuul ruuth jaate hain gulsitan jaata hai
bazm men use ‘rumi’ jab bhi dafatan dekhun
zabt hi nahin dil se har guman jaata hai
Leave a Reply