Tere dar Se Main Utha Lekin Na Mera dil Utha

Poet

tere dar se main utha lekin na mera dil utha

chhod kar ho jis tarah kaasa koi saail utha

qais kya jaane ki mera dekhna manzur tha

khud-bakhud ho jab hava se parda-e-mahmil utha

girye ne pahle hi apna kar rakha tha bandobast

main utha bhi vaan se chalne ko to pa-dar-gil utha

bosa-e-ariz mujhe dete hue darta hai kyuun

lunga kya nok-e-zaban se tiri rukh ka til utha

jab utha khanjar na us se is ada par mar gae

ham se bhi goya na bar-e-minnat-e-qatil utha

shikva-e-bar-e-gham-e-hijran hai khat men mundaraj

nama-bar kab ho ke mere naami ka haail utha

ghair ne aa kar nahin ki gudgudi gar khvab men

niind se kyuun is tarah hansta hua khil-khil utha

garche rakhta huun kahin aur paanv padta hai kahin

par ghanimat hai ki hai munh janib-e-manzil utha

ashk go atish nahin ‘nazim’ magar tezab hai

dekh chashm-e-tar se apni astin ghafil utha