Naz Butt
tira nasib banun teri chahaton men rahun
tamam umr mohabbat ki vahshaton men rahun
khumar hasrat-e-didar men rahun har dam
savad-e-ishq yunhi teri shiddaton men rahun
ye zindagi ki hararat tire sabab se hai
main lamha lamha junun ki tamazaton men rahun
ye ehtimam-e-shab-o-roz ho miri khatir
tire khayal ki rangin khalvaton men rahun
sanvarti hain sada jis ki chahaten mujh ko
miri dua hai ki main us ki hasraton men rahun
ai abr-e-vasl baras aur khul ke mujh pe baras
main bhigi bhigi hava ki shararaton men rahun
sharik-e-shauq-e-safar hai agar vo mera ‘naz’
main kyuun na mausam-e-gul ki basharaton men rahun
Leave a Reply