Zehra Nigaah
khamosh hain sahiban-e-munsif
hairan hain rahbaran-e-mukhlis
lashon ka koi vatan nahin hai
murdon ki koi zaban nahin hai
ujde hue ghar ki khamushi men
nauhe ki nidaen ek si hain
matam ka hai lahja ek jaisa
rone ki sadaen ek si hain
ankhon ki siyahiyan hain maddham
palkon ki qalam hai para-para
khunab hua hai mushaf-e-rukh
honton ke hain daere shikasta
chehre ki kitab ke varaq par!
zakhmon ne jo hashiye likhe hain
in sab ki zaban hai ek jaisi
vo sab ki samajh men aa gae hain
ik pal ke liye shab-e-alam men
chamkenge tasalliyon ke aansu
kuchh der darida-damanon men!
mahkegi sataishon ki khushbu
phir khaak ki jild men chhupega
taamil-e-vafa ka ahd-nama!
mil jaengi varison ko yaden
ho jaega qafila ravana
Leave a Reply