Aal E Ahmad Suroor
siyah raat ki sab azmaishen manzur
kisi sahar ke ujale ka aasra to mila
nazar mila na sake ham se vo to gham kya hai
ki dil se dil ke dhadakne ka silsila to mila
hai aaj aur hi kuchh zulf-e-tabdar men kham
bhatakne vaale ko manzil ka rasta to mila
sarishk-e-chashm se moti bahut lutae gae
tiri nigah ke shahidon ko khun-baha to mila
jahan nigah se insan banae jaate hain
vo bab-e-mai-kada mere liye khula to mila
sitam-zarif mohabbat ko jurm kahte hain
gunah-gar ko jiine ka aasra to mila
na rahnuma hai na manzil dayar-e-ulfat men
qadam uthate hi khizr-e-shikasta-pa to mila
mire junun ne khilae hain phuul sahra men
mire junun se baharon ko hausla to mila
samajhte the ki vafa-na-shanas hai duniya
‘surur’ ham ko bhi ik dard-ashna to mila
Leave a Reply