Poet
sikka-e-dagh-e-junun milte jo daulat mangta
tang karti muflisi gar main faraghat mangta
ranj se fursat na milti main jo rahat mangta
bojh hota sar pe gar qarun ki daulat mangta
gar mujhe hoti khabar mera masiha aaega
ai ajal ik dam ki main bhi tujh se mohlat mangta
khizr ki si zindagi hoti jo mujh nakam ki
main dua-e-vasl-e-janan ta-qayamat mangta
ashk ke dariya ne rakh li aabru ai chashm-e-tar
marte dam do gaz zamin kya bahr-e-turbat mangta
kis ki aamad aamad apne kalba-e-ahzan men hai
peshvai ko hai dil pahlu se rukhsat mangta
dar-guzarta jaan tak karta zamin us se aziiz
mujh se darban-e-dar-e-janan jo rishvat mangta
nazaa tak didar ki hasrat rahi mushtaq ko
ai masiha mar gaya bimar sharbat mangta
dar-ba-dar phirne ne meri qadr khoi ai falak
un ke dil men hai jagah milti jo khalvat mangta
minnaten kar ke chhudata bulbulon ko daam se
main zar-e-gul deta agar sayyad qimat mangta
adamiyyat se hain duur in zahidon ke qaul-o-feal
haqq-e-maurusi tha mera kyuun main jannat mangta
jaan di nahaq ko makkara ke dam men aan kar
kohkan shirin se mehnat ki jo ujrat mangta
qasd karta gar bulandi ka to pasti dekhta
kund ho jaati tabiat gar main jaudat mangta
zulf ke janjal men phansne ki khud karta dua
main sidi tha jo khuda se apni shamat mangta
qaael apni guftugu se khaas ka hota kalim
‘saadi’-e-shiraz bhi mujh se fasahat mangta
yaar hota baagh hota aise gar hote nasib
mai-kashi ki mohtasib se main ijazat mangta
dasht-e-vahshat-khez men uryan hai ‘agha’ aap hi
qasid-e-janan ko kya deta jo khilat mangta
Leave a Reply