Shuur

Ali Sardar Jafri

miri ragon men chahakte hue lahu ko suno

hazaron lakhon sitaron ne saaz chheda hai

har ek buund men afaq gungunate hain

ye sharq o gharb shumal o junub past o buland

lahu men gharq hain aur shash-jahat ka ahang

zamin ki peng tulu-e-nujum-o-shams-o-qamar

ghurub-e-sham zaval-e-shab o numud-e-sahar

tamam alam-e-ranai bazm-e-barnai

kanval ki tarah khile hain lahu ki jhilon men

hai kaenat mire dil ki dhadkanon men asiir

main ek zarra bisat-e-nizam-e-shamsi par

main ek nuqta sar-e-kaenat-e-vahm-o-shuur

ek qatra anal-bahr hai sada meri

main kaenat men tanha huun aftab ki tarah

mire lahu men ravan ved bhi hain quran bhi

shajar hajar bhi hain sahra bhi hain gulistan bhi

ki main huun varis-e-tarikh-e-asr-e-insani

qadam qadam pe jahannam qadam qadam pe bahisht