Jigar Moradabadi
saaqi ki har nigah pe bal kha ke pi gaya
lahron se khelta hua lahra ke pi gaya
be-kaifiyon ke kaif se ghabra ke pi gaya
tauba ko tod-tad ke tharra ke pi gaya
zahid! ye teri shokhi-e-rindana dekhna
rahmat ko baton baton men bahla ke pi gaya
sar-masti-e-azal mujhe jab yaad aa gai
duniya-e-e’tibar ko thukra ke pi gaya
azurdagi-e-khatir-e-saqi ko dekh kar
mujh ko ye sharm aai ki sharma ke pi gaya
ai rahmat-e-tamam miri har khata muaaf
main intiha-e-shauq men ghabra ke pi gaya
piita baghair izn ye kab thi miri majal
dar-parda chashm-e-yar ki shah pa ke pi gaya
us jan-e-mai-kada ki qasam barha ‘jigar’
kul alam-e-basit pe main chha ke pi gaya
Leave a Reply