Aal E Ahmad Suroor
shaguftagi-e-dil-e-viran men aaj aa hi gai
ghata chaman pe baharon ko le ke chha hi gai
hayat-e-taza ke khatron se dil dhadakta tha
hava chali to kali phir bhi muskura hi gai
naqab men bhi vo jalve na qaid ho paae
kiran dilon ke andhere ko jagmaga hi gai
taghaful ek bharam tha ghurur-e-janan ka
miri nigah-e-mohabbat ka ramz pa hi gai
mutalbe to bahut sakht the zamane ke
magar huquq-e-mohabbat ki yaad aa hi gai
mire junun ki khalish se ab aur kya hota
sukut-e-ahl-e-khirad ko to aazma hi gai
mata-e-qalb-o-nazar khaak hote hote bhi
jahan-e-husn ki kuchh aabru badha hi gai
thapak thapak ke sulaya jo tum ne zauq-e-sukhan
‘surur’ is ko kisi ki nazar jaga hi gai
Leave a Reply