Sanp

Kaifi Azmi

ye saanp aaj jo phan uthae

mire raste men khada hai

pada tha qadam chand par mera jis din

usi din ise maar daala tha main ne

ukhade the sab daant kuchla tha sar bhi

marodi thi dum tod di thi kamar bhi

magar chand se jhuk ke dekha jo main ne

to dum is ki hilne lagi thi

ye kuchh rengne bhi laga tha

ye kuchh rengta kuchh ghisatta hua

purane shivale ki janib chala

jahan duudh is ko pilaya gaya

padhe panditon ne kai mantar aise

ye kam-bakht phir se jilaya gaya

shivale se nikla vo phunkarta

rag-e-arz par dank sa marta

badha main ki ik baar phir sar kuchal duun

ise bhari qadmon se apne masal duun

qarib ek viran masjid thii, masjid men

ye ja chhupa

jahan is ko petrol se ghusl de kar

hasin ek taaviz gardan men daala gaya

hua jitna sadiyon men insan buland

ye kuchh us se uncha uchhala gaya

uchhal ke ye girja ki dahliz par ja gira

jahan is ko sone ki kechul pahnai gai

salib ek chandi ki siine pe us ke sajai gai

diya jis ne duniya ko paigham-e-amn

usi ke hayat-afrin naam par

use jang-bazi sikhai gai

bamon ka gulu-band gardan men daala

aur is dhaj se maidan men us ko nikala

pada us ka dharti pe saaya

to dharti ki raftar rukne lagi

andhera andhera zamin se

falak tak andhera

jabin chand taron ki jhukne lagi

hui jab se science zar ki mutia

jo tha alam ka e’tibar uth gaya

aur is saanp ko zindagi mil gai

ise ham ne zahhak ke bhari kandhe pe dekha tha ik din

ye hindu nahin hai musalman nahin

ye donon ka maghz aur khuun chatta hai

bane jab ye hindu musalman insan

usi din ye kam-bakht mar jaega