Ahmad Nadeem Qasmi
jangal jangal aag lagi hai basti basti viran hai
kheti kheti raakh udti hai duniya hai ki bayaban hai
sannate ki haibat ne sanson men pukaren bhar di hain
zehnon men mabhut khayalon ne talvaren bhar di hain
qadam qadam par jhulse jhulse khvab pade hain rahon men
subh ko jaise kaale kaale diye ibadat-gahon men
ek ik sang-e-mil men kitni ankhen hain pathrai hui
ek ik naqsh-e-qadam men kitni raftaren kafnai hui
ham-safro ai ham-safro kuchh aur bhi nazdik aa ke chalo
jab chalna hi muqaddar thahra haath men haath mila ke chalo
Leave a Reply